Дунаим щыцIэрыIо къэ­шъокIо ансамблэу «Налмэсым» иконцертхэр Тыркуем гъэшIэгъонэу щыкIуагъэх. Адыгэ хасэхэу Тыркуем щызэхащагъэмэ яIофшIэн чанэу хэлажьэх Фатихь Турхьан, Шыгъэлыгъо Уаджит, нэ­мыкIхэри. «Налмэсым» ипчыхьэзэхахьэхэр дэгъоу зэрэ­кIуагъэхэм фэшI зыцIэ къе­сIогъэ тилъэпкъэгъумэ щытхъубэ къалэжьыгъ.

«Налмэсым» иконцертэу Анатолие изыкъэгъэлъэгъопIэ гупчэ щыкIуагъэр цIыфмэ ащыгъупшэжьырэп. Залыр тырку щэтырэ теплъэ иIэу шIыгъэ. КъэшъокIо купхэм концерт къыщаты зыхъукIэ тIысыпIэ 2500-рэ щагъэуцу. «Налмэсым» еплъыгъэхэр нэбгырэ 3000-м нахь мэ­кIагъэп. Политикэшхом пылъхэр, бизнесым хэщагъэхэр, УФ-м илIыкIохэр, искусствэр зикIэсэ цIыф къызэрыкIохэр залым чIэсыгъэх.

Адыгэ Хасэм итхьаматэу Шыгъэлыгъо Уаджит пчы­хьэ­зэхахьэм хэлажьэрэмэ «Налмэсым» икъэбархэр къафиIотагъ. «Концертым тызэреплъырэм фэшI тэ­гушIо. Абхъазымрэ Къыблэ Осетиемрэ шъхьафит гъэ­псыкIэм тетэу псэунхэ алъэ­кIы зэрэхъугъэри тигуапэ», — къыIуагъ Шыгъэлыгъо Уа-джит.

Пчыхьэзэхахьэр Осетием къикIыгъэ кIалэм зэрищагъэ, лъэпкъ Iофыгъохэм атегущы­Iагъэх. «Налмэсым» ихудожественнэ пащэу Къулэ Мыхьа­мэд бысымхэр дахэу къазэрэ­пэгъо­кIыгъэхэм фэшI лъэшэу зэрафэразэр зэхахьэм къыщи­Iуагъ.

«Налмэсым» еплъы зы­шIоигъоу Тыркуем исыр макIэп. Дунаим щыцIэрыIо ансамблэм ахэр къежэх.